1. വെള്ളിയ്ക്ക് ഒരു ഉത്ഭവസ്ഥാനവും [QBR] പൊന്ന് ഊതിക്കഴിക്കുവാൻ ഒരു സ്ഥലവും ഉണ്ട്. [QBR]
2. ഇരുമ്പ് മണ്ണിൽനിന്നെടുക്കുന്നു; [QBR] കല്ലുരുക്കി ചെമ്പെടുക്കുന്നു. [QBR]
3. മനുഷ്യൻ അന്ധകാരത്തിന് ഒരു അതിർ വയ്ക്കുന്നു; [QBR] കൂരിരുളിലെയും അന്ധതമസ്സിലെയും കല്ലിനെ [QBR] അങ്ങേയറ്റംവരെ ശോധന ചെയ്യുന്നു. [QBR]
4. താമസമുള്ള സ്ഥലത്തുനിന്ന് ദൂരെ അവർ കുഴികുത്തുന്നു; [QBR] നടന്നുപോകുന്ന മനുഷ്യന് അവർ മറന്നു പോയവർ തന്നെ; [QBR] മനുഷ്യർക്ക് അകലെ അവർ തൂങ്ങി ആടുന്നു.
5. ഭൂമിയിൽനിന്ന് ആഹാരം ഉണ്ടാകുന്നു; [QBR] അതിന്റെ ഉൾഭാഗം തീകൊണ്ടെന്നപോലെ മറിയുന്നു. [QBR]
6. അതിലെ പാറകൾ നീലരത്നത്തിന്റെ ഉല്പത്തിസ്ഥാനം; [QBR] സ്വർണ്ണപ്പൊടിയും അതിൽ ഉണ്ട്. [QBR]
7. അതിന്റെ പാത കഴുകൻ അറിയുന്നില്ല; [QBR] പരുന്തിന്റെ കണ്ണ് അതിനെ കണ്ടിട്ടില്ല. [QBR]
8. ഘോരകാട്ടുമൃഗങ്ങൾ അതിൽ ചവിട്ടിയിട്ടില്ല; [QBR] ഭീകരസിംഹം അതിലെ നടന്നിട്ടുമില്ല. [QBR]
9. അവർ തീക്കൽപാറയിലേക്ക് കൈനീട്ടുന്നു; [QBR] പർവ്വതങ്ങളെ അവർ വേരോടെ മറിച്ചുകളയുന്നു. [QBR]
10. അവർ പാറകളുടെ ഇടയിൽകൂടി ചാലുകൾ വെട്ടുന്നു; [QBR] അവരുടെ കണ്ണ് വിലയേറിയ വസ്തുക്കളെയെല്ലാം കാണുന്നു. [QBR]
11. അവർ നീരൊഴുക്കുകളെ ഒഴുകാത്തവിധം തടഞ്ഞുനിർത്തുന്നു; [QBR] മറഞ്ഞിരിക്കുന്നവയെ അവർ വെളിച്ചത്ത് കൊണ്ടുവരുന്നു. [QBR]
12. എന്നാൽ ജ്ഞാനം എവിടെ കണ്ടുകിട്ടും? [QBR] വിവേകത്തിന്റെ ഉത്ഭവസ്ഥാനം എവിടെ? [QBR]
13. അതിന്റെ വില മനുഷ്യൻ അറിയുന്നില്ല; [QBR] ജീവനുള്ളവരുടെ ദേശത്ത് അതിനെ കണ്ടെത്തുന്നില്ല. [QBR]
14. അത് എന്നിൽ ഇല്ല എന്ന് ആഴമേറിയ സമുദ്രം പറയുന്നു; [QBR] അത് എന്റെ പക്കൽ ഇല്ല എന്ന് കടലും പറയുന്നു. [QBR]
15. സ്വർണ്ണം കൊടുത്താൽ അത് കിട്ടുന്നതല്ല; [QBR] അതിന്റെ വിലയായി വെള്ളി തൂക്കിക്കൊടുക്കാറില്ല. [QBR]
16. ഓഫീർപൊന്നോ വിലയേറിയ ഗോമേദകമോ [QBR] നീലരത്നമോ ഒന്നും അതിന് പകരമാകുകയില്ല; [QBR]
17. സ്വർണ്ണവും സ്ഫടികവും അതിന് തുല്ല്യമല്ല; [QBR] തങ്കആഭരണങ്ങൾ പകരം കൊടുത്ത് അത് നേടാൻ കഴിയുകയില്ല. [QBR]
18. പവിഴത്തിന്റെയും പളുങ്കിന്റെയും പേര് പറയുകയും വേണ്ടാ; [QBR] ജ്ഞാനത്തിന്റെ വില മുത്തുകളേക്കാൾ അധികമാണ്. [QBR]
19. എത്യോപ്യയിലെ പുഷ്യരാഗം അതിനോട് സമമല്ല; [QBR] തങ്കംകൊണ്ട് അതിന്റെ വില മതിക്കാകുന്നതുമല്ല. [QBR]
20. പിന്നെ ജ്ഞാനം എവിടെനിന്നു വരുന്നു? [QBR] വിവേകത്തിന്റെ ഉത്ഭവസ്ഥാനം എവിടെ? [QBR]
21. അത് സകലജീവികളുടെയും കണ്ണുകൾക്ക് മറഞ്ഞിരിക്കുന്നു; [QBR] ആകാശത്തിലെ പക്ഷികൾക്ക് അത് മറഞ്ഞിരിക്കുന്നു. [QBR]
22. ഞങ്ങളുടെ ചെവികൊണ്ട് അതിനെപ്പറ്റി കേട്ടിട്ടുണ്ട് [QBR] എന്ന് നരകവും മരണവും പറയുന്നു. [QBR]
23. ദൈവം അതിലേക്കുള്ള വഴി അറിയുന്നു; [QBR] അതിന്റെ ഉത്ഭവസ്ഥാനം അവിടുത്തേക്ക് നിശ്ചയമുണ്ട്. [QBR]
24. ദൈവം ഭൂമിയുടെ അറ്റങ്ങളിലേക്ക് നോക്കുന്നു; [QBR] ആകാശത്തിന്റെ കീഴെല്ലാം കാണുന്നു. [QBR]
25. ദൈവം കാറ്റിനെ തൂക്കിനോക്കുകയും [QBR] വെള്ളത്തിന്റെ അളവ് നിശ്ചയിക്കുകയും ചെയ്യുന്നു. [QBR]
26. ദൈവം മഴയ്ക്ക് ഒരു നിയമവും [QBR] ഇടിമിന്നലിന് ഒരു വഴിയും ഉണ്ടാക്കിയപ്പോൾ [QBR]
27. അവിടുന്ന് അത് കണ്ട് വർണ്ണിക്കുകയും [QBR] അത് സ്ഥാപിച്ച് പരിശോധിക്കുകയും ചെയ്തു. [QBR]
28. കർത്താവിനോടുള്ള ഭക്തി തന്നെ ജ്ഞാനം; [QBR] ദോഷം അകന്ന് നടക്കുന്നത് തന്നെ വിവേകം [QBR] എന്ന് ദൈവം മനുഷ്യനോട് അരുളിച്ചെയ്തു. [PE]