1. കള്ളത്തുലാസ്സ് യഹോവയ്ക്ക് വെറുപ്പ്; [QBR] ശരിയായ തൂക്കം അവിടുത്തേക്ക് പ്രസാദകരം. [QBR]
2. അഹങ്കാരം വരുമ്പോൾ ലജ്ജയും വരുന്നു; [QBR] താഴ്മയുള്ളവരുടെ പക്കൽ ജ്ഞാനമുണ്ട്. [QBR]
3. നേരുള്ളവരുടെ സത്യസന്ധത അവരെ വഴിനടത്തും; [QBR] ദ്രോഹികളുടെ വക്രത അവരെ നശിപ്പിക്കും. [QBR]
4. ക്രോധദിവസത്തിൽ സമ്പത്ത് ഉപകരിക്കുന്നില്ല; [QBR] നീതിയോ മരണത്തിൽനിന്ന് വിടുവിക്കുന്നു. [QBR]
5. നിഷ്കളങ്കന്റെ നീതി അവന് നേർവഴി ഒരുക്കും; [QBR] ദുഷ്ടൻ തന്റെ ദുഷ്ടതകൊണ്ട് വീണുപോകും. [QBR]
6. നേരുള്ളവരുടെ നീതി അവരെ വിടുവിക്കും; [QBR] ദ്രോഹികൾ അവരുടെ ദുർമ്മോഹത്താൽ പിടിക്കപ്പെടും. [QBR]
7. ദുഷ്ടൻ മരിക്കുമ്പോൾ അവന്റെ പ്രതീക്ഷ നശിക്കുന്നു; [QBR] നീതികെട്ടവരുടെ ആശയ്ക്ക് ഭംഗം വരുന്നു. [QBR]
8. നീതിമാൻ കഷ്ടത്തിൽനിന്ന് രക്ഷപെടുന്നു; [QBR] ദുഷ്ടൻ അവന് പകരം അകപ്പെടുന്നു. [QBR]
9. വഷളൻ വായ്കൊണ്ട് കൂട്ടുകാരനെ നശിപ്പിക്കുന്നു; [QBR] നീതിമാന്മാർ പരിജ്ഞാനത്താൽ വിടുവിക്കപ്പെടുന്നു. [QBR]
10. നീതിമാന്മാർ ശുഭമായിരിക്കുമ്പോൾ പട്ടണം സന്തോഷിക്കുന്നു; [QBR] ദുഷ്ടന്മാർ നശിക്കുമ്പോൾ ആർപ്പുവിളി ഉണ്ടാകുന്നു. [QBR]
11. നേരുള്ളവരുടെ അനുഗ്രഹംകൊണ്ട് പട്ടണം ഉയർച്ച പ്രാപിക്കുന്നു; [QBR] ദുഷ്ടന്മാരുടെ വായ്കൊണ്ടോ അത് ഇടിഞ്ഞുപോകുന്നു. [QBR]
12. കൂട്ടുകാരനെ നിന്ദിക്കുന്നവൻ ബുദ്ധിഹീനൻ; [QBR] വിവേകമുള്ളവൻ മിണ്ടാതിരിക്കുന്നു. [QBR]
13. ഏഷണിക്കാരനായി നടക്കുന്നവൻ രഹസ്യം വെളിപ്പെടുത്തുന്നു; [QBR] വിശ്വസ്തമാനസൻ കാര്യം മറച്ചുവയ്ക്കുന്നു. [QBR]
14. മാർഗ്ഗനിർദ്ദേശം ഇല്ലാത്തയിടത്ത് ജനം അധോഗതി പ്രാപിക്കുന്നു; [QBR] മന്ത്രിമാരുടെ ബഹുത്വത്തിലോ രക്ഷയുണ്ട്. [QBR]
15. അന്യനുവേണ്ടി ജാമ്യം നില്ക്കുന്നവൻ അത്യന്തം വ്യസനിക്കും! [QBR] ജാമ്യം നിൽക്കാത്തവൻ നിർഭയനായിരിക്കും. [QBR]
16. കൃപാലുവായ സ്ത്രീ മാനം സംരക്ഷിക്കുന്നു; [QBR] കരുണയില്ലാത്തവർ സമ്പത്ത് സൂക്ഷിക്കുന്നു. [QBR]
17. ദയാലുവായവൻ സ്വന്തപ്രാണന് നന്മ ചെയ്യുന്നു; [QBR] ക്രൂരനോ സ്വന്തജഡത്തെ ഉപദ്രവിക്കുന്നു. [QBR]
18. ദുഷ്ടൻ വൃഥാലാഭം ഉണ്ടാക്കുന്നു; [QBR] നീതി വിതയ്ക്കുന്നവന് വാസ്തവമായ പ്രതിഫലം കിട്ടും. [QBR]
19. നീതിയിൽ സ്ഥിരപ്പെട്ടിരിക്കുന്നവൻ ജീവനെ പ്രാപിക്കുന്നു; [QBR] ദോഷത്തെ പിന്തുടരുന്നവൻ തന്റെ മരണത്തിനായി പ്രവർത്തിക്കുന്നു. [QBR]
20. വക്രബുദ്ധികൾ യഹോവയ്ക്ക് വെറുപ്പ്; [QBR] നിഷ്കളങ്കമാർഗ്ഗികൾ അവിടുത്തേക്ക് പ്രസാദമുള്ളവർ. [QBR]
21. നിശ്ചയമായും ദുഷ്ടനു ശിക്ഷ വരാതിരിക്കുകയില്ല; [QBR] നീതിമാന്മാരുടെ സന്തതിയോ രക്ഷിക്കപ്പെടും. [QBR]
22. വിവേകമില്ലാത്ത ഒരു സുന്ദരി [QBR] പന്നിയുടെ മൂക്കിൽ പൊൻമൂക്കുത്തിപോലെ. [QBR]
23. നീതിമാന്മാരുടെ ആഗ്രഹം നന്മ തന്നെ; [QBR] ദുഷ്ടന്മാരുടെ പ്രതീക്ഷയോ ക്രോധമത്രേ. [QBR]
24. ഒരുവൻ വാരിവിതറിയിട്ടും വർദ്ധിച്ചുവരുന്നു; [QBR] മറ്റൊരുവൻ അന്യായമായി സമ്പാദിച്ചിട്ടും ദാരിദ്ര്യത്തിൽ എത്തുന്നു. [QBR]
25. ഔദാര്യമാനസൻ പുഷ്ടി പ്രാപിക്കും; [QBR] തണുപ്പിക്കുന്നവന് തണുപ്പ് കിട്ടും. [QBR]
26. ധാന്യം പൂട്ടിയിട്ടുകൊണ്ടിരിക്കുന്നവനെ ജനങ്ങൾ ശപിക്കും; [QBR] അത് വില്ക്കുന്നവന്റെ തലമേൽ അനുഗ്രഹം വരും. [QBR]
27. നന്മയ്ക്കായി ഉത്സാഹിക്കുന്നവൻ പ്രീതി സമ്പാദിക്കുന്നു; [QBR] തിന്മ തേടുന്നവന് അത് തന്നെ ലഭിക്കും. [QBR]
28. തന്റെ സമ്പത്തിൽ ആശ്രയിക്കുന്നവൻ വീഴും; [QBR] നീതിമാന്മാർ പച്ചയിലപോലെ തഴയ്ക്കും. [QBR]
29. സ്വഭവനത്തെ വലയ്ക്കുന്നവന്റെ അവകാശം വായുവത്രെ; [QBR] ഭോഷൻ ജ്ഞാനഹൃദയന് ദാസനായിത്തീരും. [QBR]
30. നീതിമാന് ജീവവൃക്ഷം പ്രതിഫലം; [QBR] ജ്ഞാനിയായവൻ ആത്മാക്കളെ നേടുന്നു. [QBR]
31. നീതിമാന് ഭൂമിയിൽ പ്രതിഫലം കിട്ടുന്നു എങ്കിൽ [QBR] ദുഷ്ടനും പാപിക്കും എത്ര അധികം? [PE]